04.10.2012 | 09:08

Bríó og Úlfur skara fram úr í alþjóðlegri keppni

Tveir íslenskir bjórar unnu til verðlauna í alþjóðlegu bjórkeppninni World Beer Awards 2012 sem fram fór í lok september. Úlfur var valinn besti evrópski bjórinn af tegundinni IPA eða India Pale Ale og Bríó hlaut verðlaun sem besti pilsnerbjór í Evrópu, bætti svo um betur og hlaut heimsmeistaratitil í sama flokki. Báðir bjórarnir voru þróaðir í Borg Brugghúsi, örbrugghúsi Ölgerðarinnar.

Vinsæll og margverðlaunaður
Bríó er fyrsti bjórinn sem Borg Brugghús sendi frá sér en hann kom á markað 2010. Bjórinn var þróaður í samstarfi við Ölstofu Kormáks og Skjaldar og er nefndur eftir fjöllistamanninum Steingrími Eyfjörð. Upphaflega var Bríó aðeins fáanlegur á Ölstofunni en sló í gegn og er nú seldur mun víðar og fæst einnig í verslunum ÁTVR og Fríhöfninni. WBA eru ekki fyrstu stóru verðlaun sem Bríó hlýtur því nú í vor sigraði hann einnig í stærstu bjórkeppni heims, World Beer Cup, þá í flokki þýskra pilsnerbjóra.
Árangur Bríó í WBA: http://www.worldbeerawards.com/beer/lgerin_egill_skallagrmsson_br-8092.html

Velkominn landnemi í íslenskri bjórmenningu
Úlfur kom fyrst á markað snemma árs 2011 og er fyrsti bjórinn af gerðinni Indian Pale Ale sem framleiddur er á Íslandi. IPA stíllinn er einn sá vinsælasti meðal aðdáenda örbrugghúsa um allan heim. Íslendingar tóku enda Úlfi opnum örmum rétt eins og Bríó en báðir þessir bjórar seljast reglulega upp hjá framleiðanda. Sigurvegarar WBA hljóta rétt á orðasambandinu "World's best..." á opinberum vettvangi svo Borg Brugghús getur með góðri samvisku haft stór orð um íslensku vinningshafana. Hægt er að lesa umsagnir dómara og fræðast um WBA á vefsíðu keppninnar, worldbeerawards.com.
Árangur Úlfs í WBA: http://www.worldbeerawards.com/beer/borg_brugghs_ulfur-8090.html

 

Til baka