29.08.2017 | 20:25

Floridana ávaxtasafar í plastflöskum innkallaðir

Ölgerðin Egill Skallagrímsson hefur ákveðið að innkalla Floridana ávaxtasafa í plastflöskum þar sem einstök dæmi eru um að yfirþrýstingur hafi myndast í flöskunum. Óljóst er hvort um er að ræða galla í umbúðum eða skýringa sé að leita annars staðar en meðan greining á sér stað telur Ölgerðin rétt að innkalla vöruna í plastflöskum.

Hreinir ávaxtasafar án rotvarnarefna eru eðli málsins samkvæmt kælivara og ber að meðhöndla sem slíka, en eftir að súrefni kemst í umbúðir og þeim lokað aftur getur með tímanum myndast þrýstingur í þeim. Rétt meðhöndlun er því ætíð mikilvæg og rétt að ítreka að slíka vöru á ætíð að geyma í kæli. Verði vart við yfirþrýsting í plastflöskum eftir að þær hafa verið opnaðar og þeim lokað aftur, er rétt að biðja neytendur um að gæta tilhlýðilegar varúðar þar sem kraftur getur myndast þegar tappinn er losaður.

Ölgerðin hefur þegar hafist handa við að stækka merkingar á umbúðum þar sem minnt er á að ferskir ávaxtasafar séu kælivara og beri að meðhöndla sem slíka. Ítarleg greining er í gangi á hvort skýringa sé að leita í framleiðsluferlinu sjálfu og haft hefur verið samband við erlendan umbúðaframleiðanda í sama tilgangi.

Neytendur sem eiga Floridana ávaxtasafa í plastflöskum geta skilað þeim til Ölgerðarinnar og fengið Floridana ávaxtasafa í fernum í skiptum.

Ölgerðin biður viðskiptavini sína velvirðingar á þeim óþægindum sem þessi innköllun getur skapað en telur rétt að innkalla ávaxtasafann í plastflöskum þar til skýring hefur fengist á þessum einstöku tilfellum.

 

Nánari upplýsingar veitir:

Ingibjörg Ólafsdóttir, framkvæmdastjóri samskiptasviðs í síma 412 8000

Til baka