16.01.2012 | 13:45

Óvottaða saltið er lögleg vara og hættulaust til neyslu samkvæmt framleiðanda

Mörg fyrirtæki, bæði í matvælaiðnaði og annars staðar, hafa keypt óvottað salt frá Ölgerðinni til annarra nota en í matvæli. Ölgerðin harmar að þau fyrirtæki séu dregin inn í þessa umræðu með því að nafn þeirra birtist á lista frá opinberum stofnunum.

Enn skal ítrekað að óvottaða saltið er fullkomlega lögleg vara og ekkert athugavert við að flytja inn og selja slíkt salt. Eins og margoft hefur komið fram er innihaldið í vottuðu salti og óvottuðu salti frá AkzoNobel það sama. Munurinn er eingöngu fólginn í því hvort eftirlit með vörunni sé vottað eftirlit, eins og krafa er gerð um fyrir hráefni í matvæli. Danski framleiðandinn fullyrðir að óvottaða saltið sé hættulaust til neyslu.

Ölgerðin tekur það skýrt fram að fyrirtækið og fulltrúar þess hafa aldrei reynt að blekkja einn eða neinn hvað þessa vöru varðar. Saltið hefur alltaf verið afhent í upprunalegum umbúðum og engin tilraun verið gerð til að fela útlit og eiginleika vörunnar. Kaupendum hefur alltaf staðið til boða nákvæmt vörulýsingarblað með saltinu og slík vörulýsing hefur alltaf fylgt með þegar stærri matvælafyrirtæki hafa óskað eftir formlegum tilboðum í magnkaup á salti.

Ölgerðin og þau fyrirtæki sem notuðu þetta salt í matvælaframleiðslu hafa viðurkennt andvaraleysi og mistök, vegna þess að saltið var ekki stimplað “food grade” og hafði ekki tilskylda vottun til nota í matvælaiðnaði. Ölgerðin biðst afsökunar á þeim mistökum.

Að lokum eru svo hér tvö upplýsingablöð um saltið.

Vottað salt - vörulýsingarblað      

Óvottað salt - vörulýsingarblað   

  

Til baka