06.05.2013 | 10:05

Úlfurúlfur

Fyrsti íslenski double IPA bjórinn!

Á föstudaginn var, 3. maí, hófst formlega sala á ÚlfiÚlfi, nr. 17, fyrsta íslenska double IPA bjórnum í Vínbúðunum. Eftirvæntingin hefur verið mikil síðan tilraunalögun af ölinu var kynnt fyrir rúmu ári síðan á völdum börum. Bjórinn er, eins og nafn hans gefur til kynna, tvöföld útgáfa af Úlfi, nr. 3, helmingi meira af öllu, eða hér um bil. Double IPA stíllinn er sérstaklega vinsæll meðal bjóráhugamanna um heim allan.

Þess ber að geta að ÚlfurÚlfur, nr. 17, kemur í takmörkuðu upplagi og verður ekki framleiddur aftur á þessu ári.

Um ÚlfÚlf

Humlar ljá bjór góðan ilm og beiskleika, og eru oft notaðir tilað vega upp á móti sætu annarra hráefna. Í hefðbundnum IPA bjór (Indian Pale Ale) eru humlarnir þó í aðalhlutverki. Úlfur Úlfur er hins vegar af gerðinni Double IPA og því alveg ótrúlega grimmur íbragði; dæmisaga um hvað gerist þegar humlarnir fá að að sýna klærnar og sperra sig vægðarlaust.

Vinnie Cilurzo, upphafsmaður Double IPA bjórstílsins, er lærifaðir annars bruggmeistara Borgar. Honum til heiðurs er Úlfur Úlfur gerður úr ferns konar amerískum humlum; Chinook, Columbus, Centennial og Amarillo. Útkoman er spangólandi villidýr með ýlfrandi sprækum keim af suðrænum ávöxtum á borð við rautt greipaldin og mangó.
 

Til baka