06.12.2019 | 10:13

Ölgerðin furðar sig á rangfærslum og ósamræmi VR

Ölgerðin harmar rangfærslur framkvæmdastjóra VR í kvöldfréttum Stöðvar 2.  Fyrirtækið hefur alla tíð lagt sig fram um að framfylgja kjarasamningum og iðulega gengið lengra til hagsbóta fyrir  starfsmenn og hefur gert um langt árabil.   VR staðfesti í dag þann skilning Ölgerðarinnar að sú vinnutímastytting sem Ölgerðin samdi um við starfsmenn sína fyrir allmörgum árum gangi mun lengra en sú sem samið var um í Lífskjarasamningunum svokölluðu og því í beinu ósamræmi við orð framkvæmdastjóra sama félags í kvöldfréttum Stöðvar 2, þar sem hann segir að Ölgerðin hafi reynt að koma sér undan skyldum sínum. Það er rangt.  Í fréttum síðustu daga hefur komið fram gagnrýni á fyrirtækið þar sem því hefur ranglega verið haldið fram að Ölgerðin hafi verið að reyna að komast hjá styttingu vinnutíma samkvæmt kjarasamningum.  Hið rétta í málinu er að Ölgerðin hefur um árabil verið með styttri vinnuskyldu í dreifingardeild fyrirtækisins, vöruhúsi og fjölda annarra deilda, töluvert styttri en Lífskjarasamningurinn kveður á um, og gildir einu hvort starfsmenn séu í Eflingu eða VR.  Ölgerðin hefur skriflega staðfestingu frá VR um að ofangreindir starfsmenn njóti nú betri kjara hvað vinnutíma og laun varðar en Lífskjarasamningurinn kveður á um. Því furðar Ölgerðin sig á rangfærslum framkvæmdastjóra VR. Vinna síðustu daga hefur falist í samræmingu innan deilda.

Í síðustu viku var unnið að slíkri samræmingu meðal starfsmanna lagers og bílstjóra.  Því miður var of harkalega orðað bréf afhent átta starfsmönnum og voru þeir beðnir afsökunar á orðalaginu á föstudag í síðustu viku.  Slíkt bréf er alls ekki í anda Ölgerðarinnar, sem ætíð hefur kappkostað að koma fram af virðingu við starfsfólk sitt og hefur til að mynda gefið starfsmönnum sínum frí á aðfangadag, gamlársdag og allan daginn 2. janúar um nokkurra ára skeið, sem er vel umfram alla samninga.

Starfsmenn allra annarra deilda fyrirtækisins hafa þegar samþykkt vinnutímastyttingu samkvæmt áðurnefndum Lífskjarasamningum sem tekur gildi 1. janúar 2020.

Tilgangurinn með samræmingu var að freista þess að allir starfsmenn hverrar deildar fyrir sig tækju kjör og réttindi eins stéttarfélags enda mikilvægt að ef breytingar verða á samningum að sama gangi yfir alla.   Af um 25 bílstjórum Ölgerðinnar eru 6 í VR sem taka réttindum og skyldum VR. Af um 140 starfsmönnum verksmiðju og vöruhúss voru um 3 sem tóku réttindum og skyldum VR en langflestir hinna í Eflingu.  Ölgerðin óskaði eftir því að þeir starfsmenn sem eru í VR myndu framvegis taka kjarabreytingum eftir samningum Eflingar.  Ölgerðin virðir félagafrelsi en starfsmönnum hefur verið frjálst að greiða félagsgjöld í þau stéttarfélag sem þeir kjósa.

Ölgerðin virðir alla kjarasamninga, réttindi og skyldur sinna starfsmanna og harmar rangfærslur þar um sem birst hafa.

 

 

Til baka