18.09.2020 | 14:55

Ölgerðin tekur endurvinnslu á næsta stig og minnkar plastnotkun um 30 tonn á ári

Allar plastflöskur sem notaðar eru undir drykkjarvörur hjá Ölgerðinni er nú með 50% endurunnið plast en þannig verður framleiðsla fyrirtækisins enn grænni og umhverfisvænni en áður. 

Ölgerðin fékk verkfræðistofuna Eflu til að reikna út kolefnislosun mismunandi umbúðagerða og voru helstu niðurstöður þær að innlend framleiðsla á drykkjarvörum er mun umhverfsvænni en erlend framleiðsla hvað varðar kolefnislosun og munar að meðaltali um 400%.  Það kom einnig í ljós í þessari rannsókn að sú umbúðagerð sem felur í sér minnstu losun kolefnis er plastflaska sem unnin er úr endurunnu plasti. Ölgerðin stefnir að því að vörur fyrirtækisins hafi sem minnst áhrif á umhverfið og því kynnir fyrirtækið nú til leiks þá umbúðaeiningu í drykkjarvöru sem að felur í sér minnstu losun kolefnislofttegunda. Hér er hægt að skoða skýrsluna.

Ölgerðin hvetur alla neytendur til að skila umbúðum til Endurvinnslunar og koma þannig í veg fyrir mengun sem að stafar t.d. af plasti. Plast hentar afar vel til endurvinnslu og allir hagnast á því að skila þeim á réttan stað. Á Íslandi er hlutfall þeirra umbúða sem skila sér aftur til endurvinnslu mjög hátt eða í kringum 90%.

Með því að taka í notkun endurunnið plast er Ölgerðin ennfremur að búa til eftirspurn eftir þessu hráefni. Það býr til efnahagslegan hvata til að skila inn plasti og búa þannig til hringrás plastefna sem að tryggir bestu mögulegu nýtingu þessara hráefna. 

Óþarfi er að taka fram að notkun á endurunnum plastefnum er að sjálfsögðu algjörlega örugg enda er plastið unnið í frumeiningar og flokkað áður en þær verða að nýjum umbúðum.

Á sama tíma og Ölgerðin skiptir yfir í endurunnið plast eru plastflöskurnar ennfremur léttar. Stöðugt er verið að leita leiða til þess að minnka umbúðanotkun og ný tækni gerir fyrirtækinu kleift að létta enn og aftur flöskurnar sem notaðar eru. Sú breyting sem er gerð núna mun leiða til þess að plastnotkun minnkar um 30 tonn á ári.  

Til baka